Tuesday, May 31, 2011

"கட்டி அணைத்தல்"



கட்டி அணைத்தல்.....
கட்டி அணைத்தல்???

ஆழ்மனதின் ஆர்ப்பரிக்கும் உணர்வுகளை
அள்ளி எடுத்து பொங்கும் அன்பின் நுரை

சொல்ல முடியா உணர்வுகளை
சொல்லிவிடத் துடிக்கும்
தேகத்தின் தியானம்.

கரங்களால் பேசப்படும்
கருத்துப் பரிமாற்றம்.

காதோடு சொல்லப் படும்
அன்பின் இரகசியம்.

இதயத்தின் உயிரோசைகள்
இடம் மாறும் இன்பம்.

ஆசைகள் வட்டமடிக்கும்
ஆரவல்லித் தோட்டம்.

முரண்பாடுகளை முற்றுப்புள்ளி
முத்தமிடும் போர்க்களம்.

அன்பை அன்பு ஆதூரமாய்
அரவணைக்கும் மனிதாபிமானம்

சொல்லால் சொல்ல முடியாக்
காதலின் அடையாளம்.

குழந்தையின் உணர்வு மொழி
தாயின் பாச விளக்கம்

உயிரின் பிறவிக்கு காமம்
நடத்தும் கரகாட்டம்

விழிகளின் வியப்புக் குறிகளுக்கு
விளக்கம் தரும் அடைப்புக்குறி

இரட்டைகளின் சங்கமத்தில்
ஒற்றையை பிரசவிக்கும் காதல்

உயிரையும் உடலையும்
இனம் காட்டும் காலக்கண்ணாடி.

தன்னம்பிக்கைத் தரும்
தாய்மையின் அன்பு

நல்லறிவின் அடையாளம்
நல்லோரின் மூன்றாம் கை.

இனியேனும் உன்னை.......???     

Monday, May 30, 2011

"ஒளியும் இருள்"


வனத்திடை ஊடறுத்து வனப்புக் கூட்டும்
புனலின் புனலாட்டம் புகுந்து நலம்
கேட்கும் வேர்களின் விழியில் கசியும்
காதலை மூடி மறைக்கும் பொங்குநுரை

கங்கு கனலை எங்கும் படரவிட்டு
பச்சைத் தாவணியில் இச்சைக் கொண்டு
பற்றித் தழுவும் சூரியச் சுடரில்
படர்ந்திருக்கும் காதல் யாரறிவார் பாரில்...?

புனல் போர்த்தும் மலர்ப் போர்வை
புகுந்து விளையாடும் கயல் நீந்தி
கரைசேரும் புங்கமர பசும் நிழல்
புரியும் புன்னகை புதிரை யாரறிவார்..?

இருட்டுக்குள் இழையோடும் ஒளிக்கீற்றின் நேசம்
இன்னும் உயிர்ப்போடு இருக்கும் இரகசியம்
இப்புவியில் யாரறிவார் இருட்டைத் தவிர..!
ஒளியைப் உறவாக்கும் இருள்...

ஒளிந்துக் கிடக்கும் ஒளியின் வரவுக்காய்.        

Friday, May 6, 2011

”அன்றிலும் நானும்”



அன்றிலொன்று அலர் மலர் மேல்
அமர்ந்த வண்ணம் ஆடிப் பாடி
ஆழ்துயில் மேவும் அழகு காண
வான்முகில் வந்து சிவிகை வீசும்

நதிமுகம் காண நறுமுகைத் தாவும் 
நறுமுகை முந்த நதிப் பாயும் 
சலசலக்கும் நதியின் அழகில் சிலிர்த்து 
கலகலக்கும் மனம் பளப்பளக்கும் நீர்மேனியில்

மதி மயங்கும் மதி நிழல் 
வண்ணம் கண்டு அலையும் அதனுடன்
பின்னலிட்ட மின்னலில் பின்னிக் கிடக்கும்
பேரழகு மின்னிக் காட்டும் அன்றிலை

சொட்டும் சாரலில் கொட்டும் சுகம்
கொட்டமடிக்கும் இரவில் கொட்டும் பனியில்
வட்டமிடும் எண்ணம் தொட்டுவிடும் தூரம்
வானவில் வாழ்வில் அன்றிலும் நானும்.